ЭРКАКНИ ОИЛАПАРВАР ЭРГА АЙЛАНТИРАМИЗ

 

 

 

Кўпчилик аёллар “Эримни қандай тарбияласам экан?!” деган саволларни ўзларига бериб туришади. Аввало эрингиз бола эмаски, уни тарбияласангиз. У кап-катта одам ва ўзининг қарашлари, нуқтаи-назарига эга бўлган, характери шаклланган шахс. Лекин, дугонажон, оилавий ҳаётда қироличалардек бахтиёр бўлишни истасангиз, жуфтингизни қирол қилишингиз керак. Агар қунт қилсангиз ва бироз оқилалик билан иш кўрсангиз бу ишни уддалайсиз. Қийин, жуда ҳам қийин иш. Аммо биз аёлмиз. Аёл хоҳласа тошни ҳам ёриб ўта олади. Шахс сифатида шаклланган инсонни ўзгартириш, бахтли аёлнинг эрига айлантириш оқила ва бахтли бўлишни истаган аёлларга қийин иш эмас. Бунинг учун нима қилиш керак?

Кўнгил яқинлиги керак

Аввало эркакнинг қалбини забт этиш керак. Турмуш ўртоғингиз қалбан сизники, руҳан эгизагингиз бўлса бу борадаги машаққатингиз бир мунча енгил бўлади. Дарвоқе, эҳтиёт бўлинг, ўзгартираман, тарбиялайман деб бирор қалтис ҳаракат қилиб қўйманг. Ахир, сизга вафодор, оилапарвар, муҳаббатли эр керак, истаганингизда ўйнаб, жонингизга текканида ташлаб юборадиган қўғирчоқ эмас, тўғрими?!

Оилавий турмуш жараёнида бир пайтлари сизни ўзига ром этган кўркам шаҳзода бепарво, лоқайд, тепса тебранмас эркакка айланмаслиги учун муносабатлар аввалидан бошлаб эркакни орзуингизга мослаштириб боришга ҳаракат қилинг.  Дугонажон, қулоғингизга бир ҳақиқатни айтай, аслида эркаклар ҳар доим ҳам худди ёш боладек самимий ва эгилувчан бўлади. Эркакни тарбиялаб, йўриғингизга солиб, унинг севимли қироличаси бўлиш ўзингизнинг қўлингизда. Бунинг учун эрингизга турмуш қуришингиздан олдин, тўйдан олдинги  гўзал романтик учрашувларда секин уқтириб боринг. Куёв бола тўйгача ўзининг оила бошлиғи, рўзғор таъминотчиси ва уйнинг устуни  эканини англаб, ҳис этиб борсин. Ана шунда сиз ҳам бир пайтлари соясига ошиқ бўлганингиз савлатли йигитнинг диванга чўзилганча телевизор қаршисидан турмайдиган лоқайд эркакка айланганини ўйлаб асабийлашиб юрмайсиз. Албатта бунақа ҳолатдаги аёллар “Эркакни ўзгартириб бўларканми?!” деган савол билан лаб буриб, ўзларини овутмоқчи бўладилар. Шаҳзодангиз деб билган йигит билан ўз келажагингизни кўраётган бўлсангиз, унда ҳаракатни ўша дақиқаданоқ бошланг.

Идеал инсон бўлмайди

Ҳа, дарвоқе, эркакдан идеал ясашга уринманг. Биз сиз билан “Эркакни ўзгартириб бўладими?” деган саволга жавоб излаяпмиз, зинҳор буни идеаллаштириш деб тушунманг. Ҳаётда шунчаки кўнгилни авайлаб яшаш керак. Ҳеч ким ва ҳеч нимадан идеал ясашнинг ҳожати йўқ. Ҳамма инсон ҳам мукаммал бўлмаганидек, барчанинг муносабати силлиқ ва ҳавас қиларли бўлмайди. Бу борада атрофдагиларнинг ҳаёти  билан ўз турмушингизни солиштирманг. Ҳар кимнинг ўз тақдири, ҳаёти ва ҳикояси бўлади. Сиз бахтиёр деб билган инсонларингизнинг кўнглидан нималар ўтаётганини билмайсиз-ку, тўғрими? Бировнинг ҳаётига ҳавас ёки ҳасад қилиб, ўзингизни қийнаб ўтиришдан фойда йўқ. Ундан кўра ўзингизни бахтли қилишга жиддий ҳаракат қилинг. Албатта пешонангизга ёзилган инсонни ўзингизга мослаштириш ва ўзингиз ҳам унга мослашишингиз керак.

УНУТМАНГ!!! Шунингдек, ўзгартириш ва мослашиш жараёнида ҳаддан ошмангки, бу билан муносабатларингиз чигаллашиб, ширин турмушингизга оғу аралашиши мумкин. Эрингизни йўлга солишда эҳтиёткорлик билан иш тутмасангиз, унинг шахсиятига дахл қилишингиз мумкин. Оқибатда, эркакни ўзингиздан бездирасиз. Бунақа турмушдан худо асрасин!

Эҳтиётсизлигингиз оқибатида эрингиз жаҳлдор бўлиб қолиши ва  оилада турли низолар юзага келиши; сиздан қалбан узоқлашиши ва муносабатингизни ўзига нисбатан ҳақорат деб қабул қилиши; мутаассил руҳий зўриқишда давом этиши; оиладан узоқлашиш билан сизга исён қилиши; ҳамда ўзига бўлган ишончи ва ҳурматини йўқотиши мумкин.

Ўзингизни ўзгартиринг

Менимча, сизга оёқости бўлган, оилада ҳеч қандай ҳақ ҳуқуқи бўлмаган, сиз, оилангиз тугул ҳатто ўзини, фикрини ҳимоя қилолмайдиган эрнинг кераги бўлмаса керак? Шундайми? Унда “эримни қандай тарбиялайман?!” деган саволни фикрингиздан нари қилинг-да, аввало ўзингизни намунали рафиқа қилиб тарбияланг.  Сизга “Маъсума, севимли, пазанда, сариштали” деган нисбатлар билан таъриф берилса ёқадими? Албатта ҳа! Эрингизга ҳам сизнинг аёллигингиз, ўзининг кучли ва ҳал қилувчи қарорни чиқарувчи инсонлиги ёқади. Қўполроқ эшитилса ҳам, бир гапни айтамиз, латта эрнинг шаллақи хотини бўлишни истамасангиз, бошидан рўзғор, оила масъулиятини бўйнингизга олманг. Эрингизни ўзига кўпроқ мақтанг. Унга сиз учун севимли, ҳаммадан ақлли, оилапарвар, болажон эканини тез-тез таъкидлаб  туринг.  Сиз рисоладигидек рафиқа, она ва севимли ёр бўлолсангиз эрингиз ҳам сиздаги хусусиятларга муносиб жавоб берилшга ҳаракат қилади. Эрингизни тинмай таҳқирлаганингиз, пешонангизни лаънатлаб, турмуш қуришингизга сабабчи бўлган совчилару ўртага тушганларни қарғаб юраверсангиз муносабатларингиз ҳеч қачон ижобий тусга кирмайди ва сиз ҳаммага ёмонотлиқ қилган эрингиз ҳеч қачон яхши эрга айланмайди! Яна бир нарса, эрингиз ҳақида онангиз қандай фикрдалиги ёки дугонагиз у хусусида нима деб ўйлаши сизни қизиқтирмасин. Эр —сизники! Жуфтингиз — имтиҳонгиз! У — тақдирингиз танлови ва Аллоҳ таолонинг ҳақ ҳалол никоҳи билан қисматингизга битилган жуфти ҳалолингиз. Демак, бошқалар иккингизнинг муносабатларингизга аралашишларига ҳақли эмаслар ва сиз ё эрингиз кимларгадир ёқишга мажбур эмассизлар. Ёхуд сизнинг оилангиз ота-онангиз ва дугонангизнинг оиласига ўхшаши шарт эмас. Бу дунёда ҳар бир шахс индивидуал ва унинг ҳар жабҳада, жумладан оила борасида ҳам ўзининг нуқтаи назари бўлади. Хуллас, атрофдагилардан талаб қилаётган нарсангизга аввал ўзингиз риоя қилинг. Шу жумладан эрингизнинг рисоладагидек эр бўлишини истасангиз, ўзингиз намунавий рафиқа бўлинг.

Сизга асқотиши мумкин:

* Эрингизга тазйиқ ўтказманг ва дағал мунобасатда бўлманг. Баҳсли ҳолатларда овозингизни баландлатмасликка ҳаракат қилинг. Шунингдек, эрингиз ғазабланган пайтда сизнинг чеҳрангизда мулойим табассум ва масъумалик бўлсин.

* Оилавий муносабатлар аёлдан бироз айёрлик, ҳар қандай мушкул вазиятлардан мулойимлик ва гўзал хулқ билан  чиқа олишни талаб этади. Муҳаббатнинг аълоси ҳурматдир, дейдилар. Эрингизни ҳурмат қилсангиз, уни ҳеч ким билан солиштирмасангиз ва ҳар доим жуфтингизни бошқалардан устун жиҳатларини кўра олсангиз, бир куни келиб у албатта орзуингиздаги эрга айланади.

* Ҳар доим ўзингизни, хатти-ҳаракатларингизни таҳлил қилиб боринг ва зиддиятлар юзага келганда, дарҳол ўтириб, баҳс-мунозарасиз, босиқлик билан вазиятга ечим изланг.

* Бировни ўзгартиришга уринманг, биргаликда ўзгаринг.

* Эсингизда бўлсин, ҳаёт жуда қисқа ва ёшлик ўткинчи. Ҳар лаҳзани бахт деб билинг ва албатта бахтли бўлинг!

Хулоса

Сизга кимдир тинмай насиҳат қилаверса, хатоларингизни санайверса ва ҳар бир қадамингизни танқид қилиб, ўзгаришингиз кераклигини таъкидлайверса, ёқадими? Албатта ёқмайди. Ва ўша инсондан имкони борича узоққа қочасиз. Чунки сиз ёш бола эмассиз ва нима қилаётганини ўзи яхши биладиган, ақлли инсонсиз. Жуфтингиз ҳам шундай. Унга ҳам тинимсиз тергашингиз, танқидларингиз, айблашингиз ва ундан шикоят қилиб нолишингиз ёқмайди. Ҳар инсоннинг ўз ҳақиқати бўлади ва уни ўзи англаб етиши керак. Сиз эрингизни қандай ҳолатда ва сийратда кўришни истасангиз, ўзингиз шундай қиёфага келинг. Мукаммаллик сирларини ўзингиз ўргансангиз, кўз олдингизда эрингиз ҳам мукаммал қиёфа касб эта бошлайди. Бахтингиз бекам бўлсин, дугонажон. Жуфтингиз билан бир-бирингизга ярашиб узоқ йиллар бахтли саодатли ҳаёт кечиринг.

 

Умида АДИЗОВА тайёрлади